مفهوم تعويم الدرهم المغربي الايجابيات و السلبيات

أكيد سمعتو هاد العبارة وأغلبية الناس مفاهماش معناها و مباغياش تفهمها  حيت كتقول ماشي سوقها فالسياسة و الاقتصاد.. لا فكرة غلط عندكم سوقكم هذا و خصكم تفهمو معناها لأنه أنتم بالأول و الأخير لهتستافدو أو هتضررو من هاد القضية 

عارف معندكمش مع الكتابة بزاف لكن فصالحكم تفهمو وتقراو هادشي لي هنكتب
أنا مغاديش نهدر بلغة الخشب و الهدرة ديال التلفزة غادي نشرح بطريقة بسيطة جدا لدرجة حتى الأطفال يمكن يفهموها يالاه نبداو 

المغرب كيخدم العملة لي هي الدرهم وكتخدم في المغرب فقط و حاط حداه واحد الخنشة  كيحط فيها العملات الصعبة  لي كيدخلو للبلاد الأورو الدولار  واخا؟..
هتقولو منين كنعمرو هاد الخنشة؟!
كتعمر عن طريق: -السياح -الجالية -الصادرات (ملي كنبيعو شي منتوج وطني للدول الأجنبية كنتخلصو بالعملة الصعبة) -الأجانب ملي كيصيفطو الفلوس للمغاربة..
سؤال.. فاش كنخدمو هاد الخنشة؟ - شراء البترول و القمح -ملي كتبغي تخرج برا كتصرف الفلوس يعني كتشري منها - دين كيتسال لينا كنردوه من ديك الخنشة -شراء السيارات  إلخ.. المغرب كيخلص هادشي ب € أو $ يعني كيبقى يهز من ديك الخنشة
المغرب فيه عملة تابثة يعني رابط الدرهم بالأورو € و الدولار$ يعني الى طلعو كيطلع الدرهم معاهم.. والى هبطو كيهبط معاهم
يعني$2 دولار20 درهم €1،9 اورو
(هنا غادي تقولو علاش حتى حنا منكونوش فحالهم و يكون الدرهم قدهم او قريب ليهم؟!.. لا ميمكنش حيت هما دولة مصنعة وحنا لا.. هما كيبيعو الصناعات الثقيلة و كيبيعوها للعالم بالعملة ديال بلادهم و معروف أن اذا كان الطلب على العملة أكثر من العرض قيمتها كطلع فالعالم
مفهمتيش واخا نعطيك مثال يعني حتى حنا لو كنا دولة مصنعة وكنبيعو وسائل النقل  بالدرهم يعني العالم هيولي يقلب على الدرهم باش يشري من عندنا وبالتالي قيمتو هطلع وهينافس العملات الصعبة وحتى لو بعنا بالعملة الصعبة هتعمر ديك الخنشة بزاف و قيمة الدرهم هطلع) تلفتي يالاه رجع عاود قرا بشويا عليك هنا كنتسناك 

يالاه نكملو رجوعا للموضوع
نهار يغلى البترول و تخوى الخنشة مهنلقاو باش نشريو القمح و كاع محتجيات البلاد لي كنستوردوها وهنطيحو فأزمة حقيقية و البلاد هتوقف وهيوقع لينا كيف مصر وهنضطرو نتسلفو من صندوق النقد الدولي Fmi لكن بشروط منهم
الشرط1: الفلوس لهيعطيونا نخدمهم فقط فالاستثمار باش يضمنو أن السلف ديالهم هيرجع
الشرط2: نديرو تعويم الدرهم ها حنا وصلنا لبيت القصيد لي هو تعويم الدرهم شنو هوا

..تعويم الدرهم أو بمعنى أخر تحرير سعر صرف الدرهم يعني منبقاوش رابطينو بحتى عملة يعني أن قيمة الدرهم هتطيح و كاع الواردات هيوليو غالين بزاف و مهنبقاوش قادين نشريوهم هنكتافيو بلي عندنا و السياح هيكثرو حيت المغرب هيولي رخيص بزاف و الصادرات هيكثرو حيت الثمن ديالها هيولي رخيص و الاستثمارات هتكثر.. بالتالي الخنشة لي هدرنا عليها عمرها هتخوى ومغاديش نطيحو فأزمة
نزيد نشرح أكثر بنك المغرب  هيتعامل مع الدرهم فحال طفل كيتعلم العومان  هيطلقو يعوم فالاول وهيحضيه لا يغراق هيقولو هتعوم مبين نص متر و متر و هو غادي وكيعطيه مساحة أكبر.. وملي يشوفو تعلم العومان هيخليه داك ساعة بوحدو حيت قبط راسو.. الناس لي ضد القرار كتقول : علاش هنديرو هاد الكارثة فراسنا نبقاو تابثين مع الأورو والدولار  و بيخير حيت حنا ماشي دولة مصنعة و قيمة الدرهم هتطيح بزاف و الواردات هيوليو غاليين و هيوقع تضخم فالبلاد ومنديرو التعويم حتى نوليو كنصنعو صناعات ثقيلة و نبيعو بزاف من الأحسن نبقاو فنظام الصرف الثابت حيت حامينا
أما الناس لي مع القرار كتقول راه نهار نطيحو فالأزمة  هنصدقو دايرين التعويم صحا علينا و بالشروط القاسية من FMI كيف وقع لمصر اللهم نديروه بخاطرنا محد مكاين لا أزمة لا والو ونديروه بمراحل نمرنوه على السباحة (مثال الطفل) عاد يولي يعوم لراسو حيت هيكون تعلم العومان و مهيغراقش
لي فهمتوه من هادشي لي قلت راه مزيان واخا تفهموا حتى 50%.. الأهم الفكرة توضحات عندكم

 بغيت نعرف رأيكم.. أنتم مع تعويم الدرهم أو ضد؟